သတိပြုစရာ ထိပ်ကပ်နာ 

ရာသီဥတု အကူးအပြောင်းဖြစ်လာပြီ၊အေးလာပြီဆိုတာနဲ့နှာခေါင်းလေး တရှုံ့ရှုံ့ နှာရည်လေး တစိုစိုဖြစ်လာကြပါပြီ။ရိုးရိုးနှာစေးတာကတော့ ရက်အနည်းငယ်အတွင်းမှာ ပျောက်သွားနိုင်ပေမယ့် ခုလိုဆိုရင်တော့ မျက်ရိုးထိုး၊ခေါင်းကိုက်တာတွေပါ ခံစားရမှာပဲဖြစ်ပါတယ်။ ဒါကိုတော့ မြန်မာလို ထိပ်ကပ်နာ လို့ လူသိများကြပါတယ်။ထိပ်ကပ်နာဆိုတာ နှာခေါင်းပတ်ဝန်းကျင်မှာရှိတဲ့လေအိတ်လေးတွေ ရောင်ရမ်းခြင်းကြောင့် ဖြစ်ပေါ်လာရခြင်းဖြစ်ပါတယ်။ဆေးကုသမှု ခံယူရဲ့သားနဲ့ လေအိတ်ရောင်တာ သုံးလကျော်ကြာသွားပြီ ဆိုရင်တော့ နာတာရှည် ထိပ်ကပ်နာ ဖြစ်လာရပါတော့တယ်။

ထိပ်ကပ်နာ ဘာ့ကြောင့်ဖြစ်ရသလဲ?

-အအေးမိတုပ်ကွေး ဗိုင်းရပ်စ်ပိုး၊ဘက်တီးရီးယားပိုးဝင်ခြင်း

-မှိုရောဂါဖြစ်ခြင်း

-ပန်းဝတ်မှုန်၊ဖုန်မှုန့်၊တိရိစ္ဆာန်အမွှေးနဲ့ လေထုထဲမှမီးခိုးငွေ့များကြောင့် ဓာတ်မတည့်မှုဖြစ်ခြင်း

-နှာခေါင်းအသားပိုထွက်ခြင်း

-နှာခေါင်းပေါက် နှစ်ခုကြား ခြားထားတဲ့ အရိုးနု ပုံစံမမှန်ခြင်း နဲ့

-နှာခေါင်း နဲ့ မျက်နှာမှာ ထိခိုက်ဒဏ်ရာရထားသူ

-ပန်းနာရင်ကြပ်ရှိတဲ့သူ

-ခုခံအားစနစ်ဆိုင်ရာ ရောဂါရှိတဲ့သူတွေမှာ ဖြစ်တတ်ပါတယ်။

ထိပ်ကပ်နာဖြစ်ပြီဆိုရင် မကြာခဏ နှာခေါင်းပိတ်တဲ့ ခံစားမှုမျိုး ရနိုင်ပါတယ်။ဒါ့အပြင် ပုံမှန်အတွေ့များတဲ့ရောဂါ လက္ခဏာတွေကတော့ -

-နှာရည်ထူထူပျစ်ပျစ်တွေ ယိုခြင်း

-နှာရည်က အပြင်ကိုမကျလာပဲ လည်ချောင်းထဲ နောက်ပြန်ဝင်သွားခြင်း

-နှာခေါင်းယောင်ပြီး ပိတ်နေလို့ အသက်ရှူမဝတာမျိုး ဖြစ်ခြင်း

-မျက်လုံး၊ ပါး၊ နှာခေါင်းနဲ့ နဖူးတဝိုက်မှာ နာကျင်ကိုက်ခဲပြီး ရောင်နေခြင်း

-အနံ့အရသာခံစားမှုတွေ လျော့ကျလာခြင်း တို့အပြင်

-အပေါ်မေးရိုး၊သွားနဲ့ နားများ ကိုက်ခြင်း

-ခဏခဏ လည်ချောင်းဟန့်နေခြင်း ,  လည်ချောင်းနာခြင်း

-ခံတွင်းနံ့နံခြင်း

-ခန္ဓာကိုယ်နုန်းခြင်း တို့ပဲ ဖြစ်ပါတယ်။

ထိပ်ကပ်နာ ရောဂါ ရှိ/မရှိ ဘယ်လို သိနိုင်သလဲ?

မျက်လုံးအောက်ဖက်ခြမ်း ပါးမို့နဲ့ နှာခေါင်းဘေးနားက နေရာတွေမှာ လေအိတ်တွေရှိတဲ့အတွက် ဖိကြည့်ရင် နာတာ၊တင်းတာမျိုး ခံစားရနိုင်ပါတယ်။တခြားနည်းလမ်းတွေ အနေနဲ့ကတော့

-နှာရည်နဲ့ သလိပ်ထဲမှာ ရောဂါပိုး ရှိ၊မရှိ စစ်ဆေးခြင်း

-ဓာတ်တည့်မှု ရှိ၊မရှိ အရေပြားကို allergen skin test ပြုလုပ်ကြည့်ခြင်း

-လေအိတ်နေရာများကို ဓာတ်မှန် ရိုက်ကြည့်ခြင်း

-နှာခေါင်းတွင်းသို့ မှန်ပြောင်းကြည့်ခြင်း 

-ကွန်ပျူတာဓာတ်မှန်၊သံလိုက်ဓာတ်မှန်များဖြင့် စစ်ဆေးခြင်း တို့ ဖြစ်ပါတယ်။

တကယ်လို့ ထိပ်ကပ်နာဖြစ်ပြီလို့ သံသယရှိပြီဆိုရင်တော့ နား၊နှာခေါင်း၊လည်ချောင်း အထူးကုဆရာဝန်ကြီးတွေနဲ့ သွားရောက်ပြသကုသသင့်ပါတယ်။ 

နား၊နှာခေါင်း၊လည်ချောင်း အထူးကုဆရာဝန်ကြီးများနှင့် ဆေးခန်းပြသရန် : https://mymedicine.com.mm/r/ENT ကိုနှိပ်၍ရက်ချိန်းရယူနိုင်သလို ဖုန်းနံပါတ် 5588 (သို့မဟုတ်) 09779995588 သို့ ဆက်သွယ်မေးမြန်းစုံစမ်းနိုင်ပါတယ်​နော်။

#MyMedicine #Telemedicine #ENT#Sinusitis#OnlineConsultation