မကြာခဏ ခေါင်းမူးခြင်း၊ဇက်ကြောများတောင့်တင်းနေခြင်း၊ခါးနာခြင်း၊လက်များထုံကျင်ခြင်းများ ခပ်စိပ်စိပ်ဖြစ်နေရင်တော့အရိုးကျီးပေါင်းဖြစ်နေပြီလား ဆိုတာ ဆန်းစစ်ကြည့်ရမှာပဲဖြစ်ပါတယ်။အရိုးကျီးပေါင်းဆိုသည်မှာ အရိုးပြားတွေ တခုနဲ့တခုပွတ်တိုက်မိတာများပြီး အရိုးနုပျက်စီးကုန်တဲ့ရောဂါပဲဖြစ်ပါတယ်။မြင်သာအောင် ပြောပြရရင် ကာလကြာရှည်အသုံးပြုထားတဲ့တံခါးပတ္တာတွေမှာ သံချေးတက်သလိုပါပဲ။

ဘဝတလျှောက်လုံးကျွန်မတို့ ခန္ဓာကိုယ်ကြီး မားမားမတ်မတ်ရပ်တည်နိုင်အောင် ထောက်ပံ့ပေးထားတဲ့ လည်ပင်းအရိုး၊ကျောဆစ်ရိုးနဲ့ ခါးမှာရှိတဲ့ အရိုးအဆစ်တွေကလည်း အချိန်ကြာလာတဲ့အခါ အရိုးနုနဲ့ အရိုးပြားလေးတွေ ပျက်စီးပွန်းပဲ့ရာကနေ အရိုးကျီးပေါင်းဖြစ်လာပါတော့တယ်။ပိုဆိုးလာရင်တော့ အရိုးပြားတခုနဲ့တခုကြားမှာရှိတဲ့ အာရုံကြောလေးတွေကို ဖိမိနိုင်ပြီး ထုံကျင်ခြင်းအစရှိတဲ့ အာရုံကြောလက္ခဏာတွေကိုပါ ခံစားရနိုင်ပါတယ်။အဖြစ်အများဆုံးကတော့ လည်ပင်းကျီးပေါင်းနဲ့ ခါးကျီးပေါင်းဖြစ်ပြီး ကျောရိုးကတော့ သိပ်ဖြစ်လေ့မရှိပါဘူး။

အရိုးကျီးပေါင်း က အဓိကအားဖြင့် အသက်အရွယ်ကြီးသူတွေမှာ အဖြစ်များပါတယ်။ဒါပေမယ့် နေထိုင်မှုပုံစံမမှန်ခြင်း၊အလေးအပင် မ ခြင်း၊လက်ပြင်ကုန်းခြင်း၊ဇက်ချိုးခြင်းနဲ့ အရိုးကို မကြာခဏအလုပ်ပေးမိခြင်းတို့ကြောင့် ငယ်ရွယ်သူတွေမှာပါ ကျီးပေါင်းဖြစ်တာကို တွေ့လာရပါတယ်။လေ့လာတွေ့ရှိချက်များအရ အသက်ငယ်တဲ့သူတွေ(အထူးသဖြင့် အားကစားသမားတွေနဲ့ အထုပ်ထမ်းရတဲ့အလုပ်လုပ်သူတွေ)မှာ ကျီးပေါင်းဖြစ်နှုန်း ၃-၅ ရာခိုင်နှုန်းအထိ တွေ့ရှိရပါတယ်။

လည်ပင်းကျီးပေါင်းဖြစ်ပြီဆိုရင် အရင်ဆုံး ဂုတ်နေရာက အမြဲလိုလိုတောင့်တင်းနေတာကို ခံစားရတတ်ပါတယ်။လည်ပင်းနဲ့ ဂုတ်တဝိုက်မှာ တင်းပြီး နာနေခြင်း၊ခေါင်းမူးခြင်းနဲ့ ပိုဆိုးလာလို့ အာရုံကြောပိမိတဲ့အခြေအနေတွေမှာဆိုရင် လက်ချောင်းလေးတွေနဲ့ လက်တလျှောက်လုံးပါ ထုံကျင်ခြင်း၊နာခြင်းနဲ့ ပူခြင်းတို့ ဖြစ်တတ်ပါတယ်။ခါးကျီးပေါင်းဆိုရင်တော့ ခါးနောက်ဖက်တင်ပဆုံရိုးနားတဝိုက်မှာ နာကျင်ခြင်း၊ဖြစ်တဲ့အာရုံကြောနံပါတ်ပေါ်မူတည်ပြီး ခြေဖဝါးပူခြင်း၊ပေါင်တံနဲ့ခြေသလုံးကြွက်သားများ နာကျင်ခြင်းတို့ ဖြစ်တတ်တဲ့အထိ ဆိုးဝါးနိုင်ပါတယ်။

အရိုးကျီးပေါင်းရှိတယ်လို့ ကိုယ့်ကိုယ်ကို သံသယရှိရင်တော့ ဖြစ်တဲ့နေရာကို အရိုးဓာတ်မှန်ရိုက်ခြင်း၊ကွန်ပျူတာဓာတ်မှန်ရိုက်ခြင်း နဲ့ သံလိုက်ဓာတ်မှန်ရိုက်ခြင်းတို့ဖြင့် အရိုးနံပါတ်ဘယ်လောက်မှာ ပျက်စီးနေပြီဆိုတာကို ရှာဖွေစမ်းသပ်စစ်ဆေးလို့ရပါတယ်။ကျီးပေါင်းပိုမဆိုးလာခင် လူကြီးဖြစ်ဖြစ် လူငယ်ဖြစ်ဖြစ် အရိုးအထူးကုဆရာဝန်များနှင့် တိုင်ပင်ပြီး အချိန်မှီ သောက်ဆေး၊ထိုးဆေးနဲ့ အရိုးအတွက်လေ့ကျင့်ခန်းများ ပြုလုပ်ခြင်းအားဖြင့် ပိုမဆိုးလာအောင်ကာကွယ်လို့ရပါတယ်။